हिन्दुवादी संगठनको मंगलबार बर्दिया बन्द गर्ने घोषणा

पी सी एन

बर्दिया,१८साउन। संविधानमा धर्मनिरेपक्षता शब्द हटाई नेपाललाई हिन्दु राष्ट्र कायम गर्नुपर्ने मांग राख्दै आधा दर्जनभन्दा बढि हिन्दुवादी संगठनहरुले साउन १९गते मंगलबार बर्दिया जिल्ला बन्दको घोषणा गरेका छन्।

विश्व हिन्दु महासंघ,स्वधर्म संरक्षण संस्कृति अभियान,गायत्री संस्कार संरक्षण समिति,शिव सेना नेपाल,ब्राम्हण क्षेत्री समाज,सुदामा बृद्धाश्रम कालिका र नेवा गुठी कालिका लगायतका हिन्दुवादी संगठनहरुले सोमवार एक अपिल सार्वजनिक गरि मंगलबार बर्दिया जिल्ला बन्द  र सभासद बहिष्कार गर्ने कार्यक्रम घोषणा गरेका हुन ।बन्द कार्यक्रमलाई सफल बनाउन  उनीहरुले सबैमा अपिल समेत गरेका छन्  ।

संविधानबाट नै हिन्दु राज्य कायम गर्न दबाव दिने उदेश्यले आज सोमवार बर्दियाको गुलरियामा प्रमुख जिल्ला अधिकारीलाई ज्ञापन पत्र बुझाउनुका साथै उनीहरुले दवाब —याली समेत निकालेका थिए।

८२ प्रतिशत भन्दा बढि हिन्दु धर्मालम्वी भएको नेपाल वैदिक कालदेखि नै हिन्दु राष्ट्रको रुपमा रहदै आएको र  संविधानको मस्यौदामा सुझाव संकलनका क्रममा ९०प्रतिशत भन्दा बढि जनताले धर्म निरपक्ष शब्द हटाई हिन्दु धर्म लेखिनुपर्ने सुझाव दिएकाले पनि नेपाललाई हिन्दु राष्ट्र कायम गर्नुपर्ने उनीहरुको तर्क छ ।

मंगलबारको हिन्दुवादी संगठको बर्दिया जिल्ला बन्दलाई मध्यनजर राख्दै सोमवारदेखि नै आवश्यक सुरक्षा तयारी गरिएको प्रहरीले जनाएको छ ।