राजापुर स्कुलमा सम्मान तथा शिक्षक अभिभावक संघ गठन

पी सी एन

बर्दिया,१३ फागुन । बर्दियाको राजापुर नगरपालिका ४ मा रहेको अमर शहीद श्री दशरथ चन्द मा वि राजापुरमा शनिवार अभिभावक भेला तथा शिक्षक अभिभावक संघको गठन र पूर्व अध्यक्षहरुको सम्मान, कार्यक्रम सम्पन्न भएको छ । 

कार्यक्रममा विद्यालयको चौतर्फी विकासमा पु¥याउनु भएको योगदानको उच्च कदर गर्दै विद्यालयका पूर्व अध्यक्ष तथा समाजसेवी विनोद ध्वज चन्द,वैद्यनाथ झा र पुर्व अध्यक्ष  फौज मगरका पुत्र केशर वहादुर थापालाई दोसल्ला र प्रमाण पत्रद्वारा सम्मान गरिएको थियो । 

कायक्रममा बोल्दै पूर्व अध्यक्ष चन्दले आफु राजनितीक पृष्ठभूमिबाट आए पनि विद्यालय र शैक्षिक सुधारका लागि राजनीतिको कुनै गन्ध र रङ पर्न नदिएको बताउदै  राजापुर स्कुलमा पढेको विद्यार्थी देश विदेशमा उच्च ओहदा र सम्मानमा पुगेको स्मरण समेत गरे ।

 विद्यालय सुधार गर्न अभिभावक, शिक्षक र विद्यार्थीको सहकार्य हुनु पर्ने चन्दको भनाई छ । पूर्व अध्यक्ष बैधनाथ झाले आफ्नो कार्यकालमा नै अमर शहीद विद्यालयबाटै बहुमुखी क्याम्पस सञ्चालन गर्न सकेको भन्दै शिक्षालयमा निरन्तर आफुले योगदान दिने बताए ।

 विद्यालय व्यवस्थापन समितिका अध्यक्ष गुरु प्रसाद थारुको सभापतित्वमा सम्पन्न कार्यक्रममा विद्यालयका उत्कृष्ट छात्र वसन्त बुढाथोकी, छात्रा तर्फ सुष्मा थारु र प्रतिष्ठा थारुलाई नगद ३ हजार सहित प्रमाण पत्र ले सम्मान गरिएको थियो । 

आजैको अभिवावक भेलाले अभिभावक तथा समाजसेवी विमला जिसीको अध्यक्षतामा ९ सदस्यीय शिक्षक अभिभावक संघ समेत गठन गरिएको छ । भेलामा विद्यालयको शैक्षिक गतिविधि र आगामी योजना र अर्थिक विवरण समेत प्रस्तुत गरिएको थियो ।