पी सी एन्
बर्दिया १५ चैत्र । नेपाल कम्युनिष्ट पार्टी विप्लवका कार्यकर्ताहरुले चन्दा संकलन , बम बिस्फोटन र जनप्रतिनिधिले राजीनामा दिनुपर्ने लगायतका गतिविधी संचालन गरि सुरक्षा थ्रेट उत्पन्न गराएपछि बर्दियाका सरकारी कार्यालय र स्थानीय तहहरुलाई सुरक्षा निगरानीमा राखिएको छ ।
केही समय यता जिल्लामा बम विष्फोटन,चन्दा आतंक र जनप्रतिनिधिले राजीनामा दिनुपर्ने दवाब दिइरहेकोले नागरिक सरोकारका प्रमुख कार्यालयहरु र आठै स्थानीय तहका कार्यालयलाई प्रहरीले सुरक्षा निगरानीमा राखेको हो।
प्रहरीले जिल्ला भुमि सुधार कार्यालय, जिल्ला प्रशासन, अदालत लगायतका सरकारी कार्यालय र जिल्लाका आठै तहका गाउँपालिका तथा नगरपालिका कार्यालयहरुमा विगत भन्दा अहिले सुरक्षा निगरानी बढाएको प्रमुख जिल्ला अधिकारी नारायणप्रसाद भट्टराइले बताए ।
नियमति सुरक्षा दिईरहेका कार्यालयहरुको अतिरिक्त जिल्लामा अन्य थप सरकारी कार्यालयलाई चौबिसै घण्टा सुरक्षा निगरानीमा राखिएको र ती कार्यालयहरुमा प्रहरी हवलदारको कमाण्डमा आवश्यकता अनुसार प्रहरी जवानका अतिरिक्त सिभिल ड्रेसमा समेत प्रहरी परिचालन गरिएको छ । करिब एक महिना अघि बम विस्फोटन गराईएको गुलरिया नगरपालिकाको ९ नम्बर वडा कार्यालय र गुलरिया नगरपालिकासंगै जोडिएको ७ र ८को सयुक्त वडा कार्यालयलाई पनि प्रहरीले सुरक्षा निगरानीमा राखेको छ । प्रमुख जिल्ला अधिकारी नारायणप्रसाद भट्टराईले जिल्लामा सुरक्षा टाईट गरि सरकारी कार्यालयमा सुरक्षा निगरानी बढाएको बताए । सरकारी धन सम्पत्तिको रक्षा तथा कुनै अप्रिय घटना नघटोस भनेर पनि पूर्व सुरक्षा सर्तकता अपनाईएको उनको भनाई छ । “शान्ति, सुरक्षा कायम राख्ने सन्र्दभमा हामी कटिबद्ध र प्रतिबद्ध छौ, आवश्यकता अनुसार हामीले प्रहरी परिचालन गरि सुरक्षा निगरानी बढाएका हौं, उनले भने ।”
मधुवन नगरपालिका कार्यालय र गुलरिया नगरपालिका वडानम्बर ९मा नेपाल कम्युनिष्ट पार्टीका कार्यकर्ताहरुले बम विस्फोट गराईएको भएपनि सो घटनाको सम्बन्धमा आधिकारिक जम्मेवारी पनि अहिलेसम्म कसैले पनि औपचारिक जिम्मेवारी लिएको छैन् ।
Comments
Post a Comment