कांग्रेसमा अब गुट रहँदैन : कांग्रेस सभापति देउवा

पी सी एन / लुम्बिनी पत्र
रामेछाप, असार २३ ।  पूर्वप्रधानमन्त्री तथा कांग्रेस सभापति शेरबहादुर देउवाले पार्टीमा रहेका सबै गुटको अन्त्यका लागि अभियान थालेको बताएका छन् । नेपाल प्रेस युनियन रामेछापले शनिबार बिहान मन्थलीमा आयोजना गरेको पत्रकार भेटघाटमा देउवाले भने, ‘अब कुनै गुट रहँदैन, त्यसैका लागि म दौडिरहेको छु ।’
सभापति देउवाले मुलुकमा एकदलीय तानाशाहको उदय हुने संकेत आएको भन्दै त्यसका विरुद्ध कांग्रेसले सडक र सदन दुवैतिर आन्दोलन गर्ने बताए। उनले विधिको शासन कुल्चेर केपी ओली नेतृत्वको सरकारले मुलुकमा अधिनायकवाद ल्याउन खोजेको आरोप लगाए। कांग्रेसले सधैं रचनात्मक कामका लागि सरकारलाइ सहयोग गर्ने समेत उनले बताए। ‘लोकतन्त्रमा विरोध गर्ने ःथान दिनुपर्छ,’ उनले भने, ‘विरोध गर्न रोक्ने ठाँउ समेत नराख्ने गरी निषेधज्ञा लगाउनु अधिनायकवादको संकेत हो।’
उनले आफ्नो सरकारले गरेका विधिसम्मत निर्णय खारेज गरेकोमा आपत्ति जनाए। प्रदेश प्रमुखको नियुक्तिमा वैधानिकता उठिरहेको प्रसंगमा देउवाले भने, ‘सपथ खाउञ्जेल वैधानिक हुने, अहिले नहुने हुन्छ?’
चीनबाट अहिले नै रेल ल्याउने कुरा दिवासपना भएको भन्दै देउवाले ओली सरकार भारतसंग लम्पसार परेको आरोप लगाए।