कोकोफ ले विविध कार्यक्रमका साथ बर्दियामा विश्व वातावरण दिवस मनाउन थाल्यो

पी सी एन,२१जेठ । प्रत्येक वर्ष जुन ५ लाई विश्व वातावरण दिवसको रुपमा विश्वभरी मनाउने प्रचलन अनुरुप यसपटक पनि विश्व वातावरण दिवस नेपाल लगायत विश्वभर बिविध कार्यक्रम गरि मनाईने भएको छ ।यस वर्ष एउटै पृथ्वी सात अरब सपना दिगो उपभोग हाम्रो चाहना भन्ने मुल नाराका साथ विश्व वातावरण दिवस २०१५ विश्वभर विविध कार्यक्रमका साथ मनाईने तैयारी भईरहेको छ ।

बर्दियामा विश्व वातावरण दिवस यस बर्ष सुर्यपटुवा ७को ओराली बजारमा रहेको जैबिक मार्ग तथा संरक्षित बनक्षेत्र संरक्षण केन्द्र —कोकोफले बिविध कार्यक्रमको आयोजना गरि मनाउन लागेको अध्यक्ष कृष्ण परियारले जानकारी दिनुभयो ।

खाता लगायत देशका प्रमुख जैविक मार्गको संरक्षण गरी जनताको दिगो जीविकोपार्जनमा सहयोग पुर्याउने लक्ष्यका साथ स्थापना गरिएको संस्था कोकोफले स्थानीय खाता समन्वय समिति ,डल्ला होमस्टे व्यवस्थापन समितिसंग मिलेर सरसफाई,प्रवचन,सम्मान,सांगितिक कार्यकम,रक्तदान र निःशुल्क कान शिविर लगायतका कार्यक्रम गरि विश्व वातावरण दिवस मनाउन लागेको हो ।

जैबिक मार्ग तथा संरक्षित बनक्षेत्र संरक्षण केन्द्र —कोकोफका अध्यक्ष कृष्ण परियारका अनुसार केन्द्रले जेठ २१गते सुर्यपटुवा ,सानोश्री र ढोढरी गाविसका सबै गांउहरुमा सरसफाई ,२२गते खाता समन्वय समितिको कार्यालयमा प्रवचन,सांगितिक कार्यक्रम तथा वन हेरालुहरुलाई सम्मान र २३ गते ओराली बजारमा रक्तदान तथा कान शिविरको आयोजना गर्दैछ ।

 खाता क्षेत्रको जैविक तथा  सांस्कृतिक बिविधताको संरक्षण,पर्यटन प्रर्वद्धन,उपभोक्ता समुहहरुको सुशासन तथा संस्थागत बिकास, बन्यजन्तुहरुको चोरी शिकारी र अबैध ब्यापार नियन्त्रणका प्रभावकारी भुमिका खेल्दै आएको केन्द्रले वातावरण संरक्षणका लागि रचनात्मक कार्य पनि गर्दे आईरहेको छ ।