पोखरा आउने पर्यटकका लागि सेप्टेम्बरसम्म २०देखि ५० प्रतिशतसम्म छुट दिईने प्याकेज घोषणा

पी सी एन,१९ जेठ । स्वदेशी, भारतीय र चिनियाँ पर्यटक आकषिर्त गर्नका लागि पोखराका व्यवसायीहरुले होटलदेखि साहसिक गतिविधिसम्म सबैमा आंउदो सेप्टेम्बरसम्मका लागि छुट उपलब्ध गराउने भएका छन् । भूकम्पपछि ओरालो लागेको पर्यटन व्यवसायलाई पुरानै अवस्थामा फर्काउन पोखराका व्यवसायीहरुले बिभिन्न सेवामा आकर्षक छुट दिने भएका हुन। पोखरा पर्यटन पुनर्जागरण समितिले राजधानीमा पत्रकार सम्मेलन गरी होटल, बञ्जीजम्प र जीप फ्लायरमा ५० प्रतिशत ,ट्रेकिङमा ३० र ट्राभल बस तथा रेष्टुरेन्टहरुमा २०र२० प्रतिशत छुट दिइएको जानकारी दिईयो ।यसैगरी प्याराग्लाइडिङ र अल्ट्रालाइटमा १५ प्रतिशत छुट दिइने समितिले जनाएको छ । पोखराका पर्यटन व्यवसायीहरुले भारत तथा चीनमा नेपाल सुरक्षित भएको सन्देश पुरयाउनका लागि त्यहाँका पत्रकारहरुलाई पोखरामा फाम ट्रिपमा ल्याउने पनि बताए ।
पश्चिमाञ्चल होटल संघ, क्षेत्रीय होटल संघ चितवन र सिद्धार्थनगर होटल संघले ‘सिल्भर ट्रयांगल’ अवधारण अघि सारेका हुन् । छिमेकी मुलुक भारत र चीनमा तीनै पक्षले संयुक्त रुपमा पर्यटन प्रर्वद्धन गर्ने बताइएको छ ।पोखराको पर्यटन यथाशक्य पुनर्जागरण गर्न प्रचारप्रसार र प्रर्वद्धनका कार्यक्रम गर्ने, विभिन्न ट्रिपको आयोजना गर्ने, पोखरामा विभिन्न इभेन्ट्सहरु आयोजना गर्ने तयारीमा व्यवसायी रहेका छन् ।

पर्यटकीय सिजनको उत्तरार्ध मानिने यो समयमा पोखराका होटल ५ प्रतिशतमात्र भरिएको समितिका संयोजक गणेश बहादुर भट्टराइले जानकारी दिए । भूकम्पको डरले विदेशी पर्यटकले भ्रमण रद्द गरेका छन भने स्वदेशी पर्यटक पनि घुमफिरमा निस्किन डराइरहेका छन् ।‘हामीले छुट प्याकेजहरुलाई आन्तरिक पर्यटन बजार र बोडर सिटीहरुमा तुरुन्तै प्रचारप्रसार गर्ने कार्यक्रम छ’ समितिका संयोजक भट्टराइले भने ‘यथार्थ सन्देश फिँजाउन सकेको खण्डमा पर्यटक आकषिर्त गर्न सकिन्छ ।’ पर्यटकीय गन्तव्य पोखरा, चितवन र लुुम्बिनीलाई जोडेर ‘सिल्भर ट्रयांगल’ अवधारणा समेत अघि बढाइएको छ । यस योजनामा तीनै क्षेत्रमा रहेका होटलमा ५० प्रतिशत छुट दिन व्यवसायी सहमत भएका छन् ।